Hvalveiðar eru dýraníð!

Hvalveiðar eru dýraníð!

Ung vinstri græn fagna ákvörðun matvælaráðherra

Ung vinstri græn fagna því að Svandís Svavarsdóttir, matvælaráðherra, hafi tekið í handbremsuna og stöðvað veiðar á langreyðum í sumar á grundvelli álits fagráðs um dýravelferð. Fyrir liggur að veiðarnar eru ósamrýmanlegar lögum um velferð dýra en óréttlætanlegt er með öllu að aflífa dýr með jafn ómannúðlegum hætti og raun ber vitni. Ráðherra ber skylda til að tryggja að lögum um velferð dýra sé framfylgt og ef fyrirtæki geta ekki uppfyllt lagalegar skyldur sínar eiga þau sér ekki framtíð. Þar að auki gegna hvalir mikilvægu hlutverki í lífríki sjávar og stuðla að heilbrigði vistkerfa. Vissulega þýðir ákvörðun matvælaráðherra aðeins tímabundna stöðvun á veiðum á langreyðum en Ung vinstri græn vona að næstu skref í málinu verði að banna hvalveiðar með öllu og tryggja það bann í sessi með lagasetningu svo frekum körlum takist ekki að hnekkja banninu með bellibrögðum. Áhugamál eins manns má aldrei verða lífríkinu, sem og orðspori Íslands, skaðlegt.